Semjuskjal

 

15. JUNI 2023 UM ENDAMÁLIÐ HJÁ JAVNSTØÐUNEVNDINI

Javnstøðunevndin er sjálvstøðug nevnd undir Almannamálaráðnum og uppgávurnar hjá Javnstøðunevndini eru ásettar í javnstøðulógini.

Tað er uppgávan hjá Javnstøðunevndini at virka fyri at beina burtur allan mismun vegna kyn og at fremja javnstøðu í samfelagnum. Øll mál verða av nevndini viðgjørd við virðing fyri øllum viðkomandi atlitum, men við javnstøðu sum fremsta endamál.

Harumframt skal Javnstøðunevndin:

  • røkja uppgávurnar, sum eru nevndar í javnstøðulógini

  • hava eftirlit við, at javnstøðulógin verður hildin

  • vera ráðgevi hjá myndugleikum, stovnum, feløgum og einstaklingum í javnstøðuspurningum

  • geva tilmæli í javnstøðumálum

  • viðgera klagur frá fólki um mismun vegna kyn

Javnstøðunevndin viðurkennir, at menniskju eru ymisk, og at ávísir sosialir, mentanarligir og strukturellir munir kunnu elva til mismun í einum demokratiskum samfelagi, ið er grundað á hugsjónir um javnstøðu. Við støði í hesum arbeiðir Javnstøðunevndin til frama fyri javnstøðu grundað á teirri grundfatan, at

  • javnrættindi eru, tá menn og kvinnur eru líka fyri lógini

  • javnstøða er, tá menn og kvinnur hava somu møguleikar, atgongd, skyldur og rættindi

  • javnstøða er, tá javnvág er millum menn og kvinnur, og tá menn og kvinnur verða javnt vird

  • javnstøða er, tá ongar óneyðugar forðingar, avbjóðingar ella munir eru, ið eru tengd at kyni

 
Allan Dalsgarð